പരാജയപ്പെട്ട പ്രവാസി ഒരു ദുരന്തമാണ്

പള്ളി കുളക്കടവില്‍ ഏകനായി ഇരിക്കുന്ന അദ്ദേഹത്തിന്റെ അടുത്തു പോയി സംസാരിക്കുമ്പോള്‍ ഇത്രയും വലിയ ദുഃഖം അദ്ദേഹം അനുഭവിക്കുന്നുണ്ടെന്ന് കരുതിയിരുന്നില്ല . ഗള്‍ഫിന്നു വിസ ക്യാന്‍സല്‍ ചെയ്താണ്  വന്നതെന്ന്  അറിയാമായിരുന്നു , അതിനെ ചുറ്റി പറ്റിയുള്ള ചോദ്യങ്ങള്‍ക്കിടയിലാണ് അദ്ദേഹം അദ്ദേഹത്തിന്‍റെ അപ്പോഴത്തെ അവസ്ഥ എന്നോട് പറഞ്ഞത്‌ . എല്ലാം പറഞ്ഞപ്പോള്‍ അദ്ദേഹത്തിനൊരു ആശ്വാസം, ആരോടെങ്കിലും തങ്ങളുടെ വിഷമങ്ങള്‍ തുറന്നു പറഞ്ഞാല്‍ കിട്ടുന്ന ഒരു ആശ്വാസം അദ്ദേഹത്തിന്‍റെ മുഖത്ത് ഞാന്‍ കണ്ടു .


അദ്ദേഹത്തിന് ഗള്‍ഫില്‍ നിന്ന് ജോലി നഷ്ടപ്പെട്ടത്‌ അപ്രതീക്ഷിതമായിട്ടായിരുന്നു . അല്ലെങ്കിലും ഗള്‍ഫിലെ ജോലിക്കൊന്നും ഒരിക്കലും ഒരു സുരക്ഷിതത്വവും ഇല്ല .  ജോലി നഷ്ടപ്പെടുന്നത് വരെ ഈ ഒരു സുരക്ഷിതത്വത്തിന്റെ പ്രശ്നത്തെ കുറിച്ചു ആരും ചിന്തിക്കാറുമില്ല .   പെട്ടെന്ന് നാട്ടില്‍ പോകേണ്ടി വന്നപ്പോള്‍ മനസ്സ് നിറയെ ഭാവിയെ കുറിച്ചുള്ള  ആശങ്കകളായിരുന്നു  , ഇനിയെന്ത്‌ ജോലി ചെയ്യും , എങ്ങനെ കുടുംബത്തെ നോക്കും , കടങ്ങള്‍ എങ്ങനെ വീട്ടും എന്നൊക്കെയുള്ള ചിന്തകള്‍  .ഈ ആശങ്കകള്‍ സ്വന്തം വീട്ടിലും പങ്കു വെക്കുമ്പോള്‍ അവിടുന്നു കിട്ടിയ മറുപടി അദ്ദേഹത്തെ ആകെ തളര്‍ത്തിയിരിക്കുകയാണ് . "ഇത്രയും കാലം ഗള്‍ഫില്‍ നിന്നിട്ട് എന്താ ഉണ്ടാക്കിയെ, എന്തേലും ഉണ്ടാക്കിയിരുന്നെങ്കില്‍ ഇപ്പൊ ഇങ്ങനത്തെ അവസ്ഥ വരുമോ '" എന്ന ചോദ്യമത്രേ വീട്ടില്‍ നിന്നും കിട്ടിയത് . ഗള്‍ഫില്‍ പോയി സമ്പന്നരായി വന്ന അയല്‍പക്കത്തെയും , കുടുംബത്തിലെയും പലരെയും താരതമ്യപ്പെടുത്തി അവരൊക്കെ അത് ഉണ്ടാക്കിയില്ലേ, ഇത് ഉണ്ടാക്കിയില്ലേ എന്നൊക്കെ യുള്ള വിശദികരണവും .

ഇരുപതു വര്‍ഷത്തോളം അദ്ദേഹം ഗള്‍ഫു പ്രവാസിയായിരുന്നു . അതിനിടയില്‍ രണ്ടു വര്‍ഷത്തേക്ക് കിട്ടുന്ന രണ്ടു മാസത്തെ ലീവാണ് അദ്ദേഹത്തിനു ആകെയുള്ള ആശ്വാസമോ , ജീവിച്ചെന്നോ പറയാനുള്ള സമയം . ഒരു സാധാരണ ജോലി യായിരുന്നു അദ്ദേഹത്തിനുണ്ടയിരുന്നത് . തന്റെ ചിലവും കഴിച്ചു , ചിലപ്പോള്‍ അതില്‍ നിന്നും മിച്ചം പിടിച്ചു അദ്ദേഹം തനിക്ക് കിട്ടിയ വരുമാനം മുഴുവനും കുടുംബത്തിലേക്ക് തന്നെയായിരുന്നു അയച്ചത്‌ , വേറെ ദുശ്ശീലങ്ങള്‍ പോലും ഉണ്ടായിരുന്നില്ല . കുടുംബത്തിലേക്ക്‌ അയച്ച പൈസ എന്ത് ചെയ്യുന്നു എന്ന് പോലും അന്വേഷിക്കാന്‍ മെനക്കെടാത്ത ഒരു പാവം മനുഷ്യന്‍.  അദ്ദേഹത്തിനു ഗള്‍ഫില്‍ പോയിട്ട് സമ്പന്നന്‍ ആകാന്‍ കഴിഞ്ഞിട്ടുണ്ടാവില്ല ,പക്ഷെ അദ്ദേഹവും ഒരു മനുഷ്യനാണ് , കുടുംബത്തോട് അങ്ങേയറ്റം സ്നേഹമുള്ള മനുഷ്യന്‍ . ആ ചോദ്യങ്ങള്‍ അതിന്റെ വ്യാപ്തി അറിഞ്ഞു കൊണ്ടായിരിക്കില്ല ഒരു പക്ഷെ അദ്ദേഹത്തിന്‍റെ വീട്ടുകാര്‍ പോലും ചോദിച്ചിട്ടുണ്ടാവുക . ജീവിതത്തിന്റെ നല്ലൊരു ഭാഗം കുടുംബത്തിന് വേണ്ടി ഉഴിഞ്ഞു വെച്ചു അവസാനം കിട്ടുന്ന ഇത്തരം വാക്കുകള്‍ തന്നെ മതി ഒരാളെ തളര്‍ത്താന്‍.  ഇങ്ങനെയുള്ള ചോദ്യങ്ങള്‍ എല്ലാ പ്രവാസികളുടെ കുടുംബത്തില്‍ നിന്നും ഉണ്ടാകും എന്നല്ല , മറിച്ചു നാം അറിഞ്ഞും അറിയാതെയും നമ്മുടെ ചുറ്റുപാടില്‍ ഇത് പോലെയോ അല്ലാതെയോ പ്രവാസികള്‍ വേദനിക്കപ്പെടുന്നു എന്നത് ഒരു നഗ്ന സത്യമാണ് . ഇത്തരം ചോദ്യങ്ങള്‍ കുടുംബത്തിലും സമൂഹത്തിലും എപ്പോഴും പതുങ്ങിയിരിക്കുന്നു .

 വിജയിച്ച പ്രവാസികള്‍ സമൂഹത്തില്‍ നിറഞ്ഞു നില്‍ക്കുന്നു , അവര്‍ക്കായി പ്രവാസി ദിനങ്ങള്‍ നടത്തപ്പെടുന്നു , മണി മാളികകളും , ആഡംബര വാഹനങ്ങളും , സ്വത്തുക്കളും ഒക്കെ  അവരുടെ പ്രവാസത്തെ  പ്രതിനിധീകരിക്കുന്നു . എല്ലാ പ്രവാസികളുടെയും കുടുംബങ്ങളും , സമൂഹവും ഒരു പ്രവാസിയില്‍  നിന്നും പ്രതീക്ഷിക്കുന്നത് അതൊക്കെയാണ് . പക്ഷെ  ബഹു ഭൂരിപക്ഷവും പരാജയപ്പെട്ട പ്രവാസികളാണ്. ജീവിക്കാനുള്ള വരുമാനം മാത്രം നേടിയവര്‍.  സ്വത്തും  സമ്പാദ്യവും  ഉണ്ടാക്കാന്‍ പറ്റാത്തവര്‍.  അസുഗവും, കട ബാധ്യതകളും കൊണ്ട് നാട്ടിലേക്ക്‌ തിരിച്ചു വന്നവര്‍ .   നല്ലൊരു കാലം പ്രവാസിയായി കഴിഞ്ഞിട്ട് നാട്ടിലേക് തിരിച്ചെത്തുമ്പോള്‍    കുടുംബത്തില്‍ നിന്നും സമൂഹത്തില്‍ നിന്നും പലപ്പോഴും ഇവര്‍  ഒറ്റപ്പെടെണ്ടി വരുന്നു.   ജീവിതത്തിന്റെ സായാഹ്നത്തില്‍,  പിന്നിട്ട യൌവ്വനം ജീവിക്കാന്‍ പറ്റാതെ പോയല്ലോ എന്ന നിരാശ കൂടി  അവരെ  പിടി കൂടാന്‍ ഇതൊക്കെ   പ്രേരിപ്പിക്കുകയും  ചെയ്യുന്നു . കുടുംബം കൂടി നേരായ രീതിയില്‍ മനസ്സിലാക്കിയില്ലെങ്കില്‍   പരാജയപ്പെട്ട പ്രവാസി ഒരു ദുരന്തമാണ് .